वाशिम जिल्ह्यातील दोन अल्पवयीन मुलींवर अत्याचार करण्यात आल्याची घटना समोर आली आहे. रिसोड शहरात कॉम्प्युटर क्लासवरुन घरी जाणाऱ्या १६ वर्षीय मुलीजवळ एक अनोळखी व्यक्ती आला. त्याने सांगितले की, मी तुझ्या वडिलांचा मावस भाऊ आहे. तुझे मामा मला ओळखतात, तू माझ्या घरी चल, माझी मुलगी तुला भेटण्यासाठी इच्छुक आहे, अशा प्रकारे तिला फूस लाऊन तिला ऑटो रिक्षातून रिसोड वाशिम मार्गावरील वाकद शेतशीवरच्या निर्जनस्थळी घेऊन गेला. तिथे तरुणीला चाकूचा धाक दाखवून ४५ वर्षीय नराधमाने अत्याचार केला आहे. अत्याचार करून मुलीला घटनास्थळी सोडून आरोपी फरार झाला आहे. अशा फिर्यादीवरून रिसोड पोलिसांनी गुन्हा दाखल केला आहे. जिल्ह्यात एकाच दिवशी दोन अल्पवयीन मुलींवर अत्याचाराच्या घटना घडल्याने एकच खळबळ उडाली आहे. या प्रकरणांनंतर नागरिकांकडून तीव्र संताप व्यक्त होत आहे.
- Advertisement -
दुसरीकडे अकोला नाका परिसरातील एका १९ वर्षीय किराणा दुकानदाराने आइस्क्रीम आणण्यासाठी गेलेल्या ७ वर्षाच्या चिमुरडीचा विनयभंग केला. आइस्क्रीम आणण्यासाठी गेलेली मुलगी बराच वेळ घरी परतली नसल्याने तिच्या पालकांनी तिचा शोध घेतला. त्यावेळी चिमुकली अतिशय घाबरलेल्या अवस्थेत ती दुकानात आढळून आली. त्यानंतर पोलीस तक्रार करण्यात आली. फिर्यादीवरून विनयभंग करणाऱ्या कलश छाबडा या तरुणाला वाशिम पोलिसांनी अटक केली. त्यानंतर त्याला न्यायालयात हजर केले असता दोन दिवसांची पोलीस कोठडी सुनावण्यात आली.
