हिमकडा तुटल्यानं ४७ मजूर बर्फाखाली अडकले

देहरादून: उत्तराखंडमधील  माणा गावात हिमकडा तुटल्यानं ४७ मजूर अडकले आहेत. एकूण ५७ मजूर बर्फाखाली सापडले होते. पण त्यातील १० जणांची सुटका करण्यात आली. पण अजूनही ४७ जण अडकलेले आहेत. त्यांना सुखरुप बाहेर काढण्याचे प्रयत्न सुरु आहेत.

चमोलीचे जिल्हाधिकारी संदीप तिवारी यांनी आयआरएसशी संबंधित अधिकाऱ्यांना आवश्यक सूचना दिल्या आहेत. त्यानुसार बचाव कार्य सुरु आहे. माणा गाव आणि माणाच्या जवळ मध्य सीमा रस्ते संघटनेजवळ हिमस्खलन झाल्याची माहिती मिळल्याचं जिल्हाधिकाऱ्यांनी सांगितलं. सुदैवानं या दुर्घटनेत अद्यापपर्यंत कोणतीही जीवितहानी झालेली नाही. लष्करासह आयटीबीपी, एनडीआरएफ, एसडीआरएफची बचाव पथकं घटनास्थळी रवाना झाली आहेत.

उत्तराखंडचे मुख्यमंत्री पुष्कर सिंह धामी एक्सवर पोस्ट करुन दुर्घटनेबद्दल दु:ख व्यक्त केलं. ‘जनपद चमोलीतील माणा गावाजवळ बीआरओकडून केल्या जाणाऱ्या बांधकामादरम्यान हिमस्खलन झाल्यानं अनेक मजूर अडकल्याची दुर्दैवी बातमी समजली. आयटीबीपी, बीआरओ आणि अन्य बचाव दलांकडून मदतकार्य केलं जात आहे. सगळे श्रमिक बंधू सुरक्षित राहावेत, यासाठी भगवान बदरी विशाल यांच्याकडे प्रार्थना करतो,’ असं मुख्यमंत्र्यांनी पोस्टमध्ये म्हटलं आहे.

सीमा रस्ते संस्थेची पथकं मजुरांच्या सुटकेसाठी रवाना झाली आहेत. सध्याच्या घडीला इंडो तिबेटियन सीमा पोलीस आणि गढवाल स्काऊटची पथकं मजुरांच्या सुटकेसाठी प्रयत्न करत आहेत. दुर्घटना घडली त्यावेळी घटनास्थळी खासगी कंत्राटदारांचे मजूर मोठ्या संख्येनं काम करत होते. सीमा रस्ते संस्थेची कंत्राटी कामं सुरु असताना दुर्घटना घडली. हिमस्खलन होताच सगळे मजूर इकडे तिकडे पळू लागले. काही मजूर स्वत:ला वाचवण्यात यशस्वी ठरले. पण ५७ मजूर बर्फाखाली सापडले