मालमत्ता हडपून वृद्ध वडिलांना आणले रस्त्यावर

पुणे: खासगी कंपनीतून सेवानिवृत्त झालेल्या वडिलांची मालमत्ता आणि बँकेतील रोकड हडप करून पोटच्या मुलांनी वृद्ध वडिलांना रस्त्यावर आणल्याचा प्रकार समोर आला आहे. मुलाने मालमत्तेचे बक्षीसपत्र करून घेऊन सांभाळ करण्यास नकार दिल्याने सोमवार पेठ परिसरातील मोफत अन्नदान केंद्रावर जेवण्याची वेळ वृद्ध वडिलांवर आली आहे.

सोमवार पेठेतील गंगोत्री अपार्टमेंट येथे राहणाऱ्या ७७ वर्षीय व्यक्तीने तक्रार दिली आहे. त्यावरून त्यांचा मोठा मुलगा आणि मुलीवर गुन्हा दाखल करण्यात आला आहे. तक्रारदाराला दोन मुलगे आणि एक मुलगी आहे. तर, त्यांच्या पत्नीला कॅन्सरने ग्रासले होते. त्यांचे २००८मध्ये निधन झाले. त्यानंतर तक्रारदार सोमवार पेठेत एकटेच राहत आहेत. ते मुंढव्यातील एका खासगी कंपनीतून २००१ मध्ये सेवा निवृत्त झाले. त्यांची मुले पुण्यातच इतरत्र राहतात.

तक्रारदार यांच्या नावावर राहत्या फ्लॅटसह पुणे आणि पिंपरी-चिंचवड येथे आणखी दोन फ्लॅट होते. तर, पत्नीच्या नावावर धनकवडी येथे प्लॅट होता. दोन वर्षांपूर्वी त्यांच्या मोठ्या मुलाने ‘मी तुमचा शेवटपर्यंत सांभाळ करतो,’ असे बोलून तक्रारदार यांच्या मालमत्तेचे बक्षीसपत्र स्वत:च्या नावे करून घेतले. मात्र, त्यानंतर मुलाने तक्रारदाराची विचारपूस देखील केली नाही. तसेच, ते मुलाच्या जांभूळवाडी येथील घरी गेले असता, त्याने शिवीगाळ करून हाकलून दिले. त्याने तक्रारदाराच्या राहत्या फ्लॅटची कागदपत्रेदेखील स्वत:च्या ताब्यात घेतली आहेत. समर्थ पोलिस ठाण्याच्या उपनिरीक्षक ज्योती कुटे या प्रकरणाचा तपास करीत आहेत.

वडिलांच्या उदरनिर्वाहासाठी पैसे द्या- जिल्हा दंडाधिकाऱ्यांचा आदेश

वयोवृद्ध असूनही मुले पालन पोषण करीत नसल्याने तक्रारदाराने जिल्हा दंडाधिकाऱ्यांकडे अर्ज दाखल केला होता. त्यावर मुलांनी हंबीर यांना दरमहा दहा हजार रुपये उदरनिर्वाहासाठी द्यावे, असा आदेश देण्यात दंडाधिकाऱ्यांनी दिला होता. त्या आदेशाप्रमाणे धाकटा मुलगा दर महिन्याला पैसे देतो. मात्र, मोठा मुलगा ललित व मुलीने पैसे दिलेले नाहीत.

तिसऱ्या मुलाचे नाव गुन्ह्यातून वगळले ?

तक्रारदार यांनी ‘महाराष्ट्र टाइम्स’शी संपर्क साधून त्यांची आपबिती सांगितली. समर्थ पोलिस ठाण्यात त्यांनी दोन मुलगे आणि एका मुलीविरोधात तक्रार दिली होती. मात्र, गुन्हा दाखल करताना एका मुलाला त्यातून वगळण्यात आले आहे, असा दावा तक्रारदाराने केला आहे. त्या मुलाने हात उसने तीन लाख रुपये घेतले असून, पत्नीच्या नावावर असलेला फ्लॅट हडप केला आहे, असा आरोपही त्यांनी केला.