दहावीतील विद्यार्थिनीवर लैंगिक अत्याचार

पिंपरी चिंचवड : पुणे जिल्ह्यातील पिंपरी चिंचवड शहरातून एक धक्कादायक प्रकार उघडकीस आला आहे. क्रिएटिव्ह अकॅडमीच्या संचालकाने दहावीतील विद्यार्थिनीवर लैंगिक अत्याचार केल्याचा आरोप आहे. या प्रकरणी या संचालकाला पोलिसांनी बेड्या ठोकल्या आहेत. या घटनेने पिंपरी चिंचवड शहरात एकच खळबळ उडाली आहे.

नौशाद शेख (वय ५८) असे अटक करण्यात आलेल्या संचालकाचे नाव आहे. त्याच्यासोबत एका तरुणीला देखील ताब्यात घेण्यात आले आहे. या प्रकरणी १६ वर्षीय पीडित तरुणीने फिर्याद दिली आहे. पिंपरी चिंचवड येथील रावेत येथे हा प्रकार घडला आहे.

याबाबत पोलिसांनी दिलेली माहिती अशी की, नौशाद शेख हा पिंपरी चिंचवड शहरात क्रिएटिव्ह ॲकडमी या नावाखाली निवासी शाळा चालवतो. या निवासी शाळेत राज्यभरातून विद्यार्थी शिकण्यासाठी येत आहेत. तसेच आरोपी शेख हा विविध जिल्ह्यात जाऊन सेमिनारच्या माध्यमातून मुलांना शिक्षण घेण्यासाठी प्रोत्साहित करतो.

त्यात यवतमाळ येथे आरोपी शेख याने २०२१ मध्ये सेमिनार घेतला होता. या सेमिनारनंतर मुलीच्या वडिलांनी आपल्या मुलीची या ॲकडमीत ऍडमिशन घेतली. त्यानंतर २०२२ मध्ये या आरोपी संचालकाने तो राहत असलेल्या फ्लॅटवर बोलावून घेत तिच्यावर अत्याचार करण्याचा प्रयत्न केला. मात्र पिडीत मुलीने प्रतिकार करत स्वतःची सुटका यातून करून घेतली होती. मात्र त्यानंतर देखील तो तिला त्रास देताच होता. त्यानंतर नोव्हेंबर २०२२ मध्ये आरोपीने संबधित मुलीला “तुला उटणे लावून आंघोळ घालून देतो” असे म्हणत विनयभंग केला. त्यानंतर तिच्याशी जबरदस्तीने संबंध प्रस्तापित केले. असे फिर्यादीत नमूद करण्यात आले आहे.

काही दिवसानंतर मुलगी दबावाखाली रहात होती. त्यानंतर विद्यार्थिनीने कुटुंबीयांना सर्व प्रकार सांगितला. हे ऐकल्यानंतर घरच्यांच्या पायाखालची जमीनच सरकली. त्यांनी या गोष्टीतून सावरत थेट पिंपरी चिंचवड पोलिसांना सर्व हकिगत सांगितली. पोलिसांनी घटनेचे गांभीर्य ओळखत या नराधम संचालकाला बेड्या ठोकल्या आहेत.