पोलीस उपायुक्त, दोन निरिक्षक, तीन कॉन्स्टेबलवर बलात्काराचा आरोप

मुंबई : मुंबई पोलिस दलातील प्रत्येक अधिकारी आणि कर्मचाऱ्याच्या मोबाइलवर सध्या एक पत्र प्रचंड व्हायरल होत आहे. शुक्रवारपासून व्हायरल होणाऱ्या या पत्राने खळबळ निर्माण केली आहे. मुंबई पोलिसांच्या मोटर परिवहन विभागातील आठ महिला पोलिसांनी पोलिस उपायुक्त, दोन निरीक्षक, तीन कॉन्स्टेबल यांच्यावर बलात्काराचा आरोप केल्याचे हे पत्र आहे. याबाबत वरिष्ठ अधिकाऱ्यांकडून सारवासारव केली जात असली तरी या ‘लेटरबॉम्ब’ने पोलिस दलात मोठी खळबळ उडाली आहे.

मुख्यमंत्री, गृहमंत्री, मुंबईचे पोलिस आयुक्त, सर्व पोलिस सहआयुक्त यांच्या नावाने पोस्टाच्या माध्यमातून धाडण्यात आलेल्या पत्राची प्रत शुक्रवारपासून समाजमाध्यमांमध्ये व्हायरल झाली. हाहा म्हणता संपूर्ण पोलिस दलात ते प्रत्येकापर्यंत पोहोचले. मोटर परिवहन विभागातील आठ महिला कर्मचाऱ्यांची नावे आणि सह्या या पत्रावर आहेत. चालक म्हणून कार्यरत असलेल्या या महिला पोलिसांनी वरिष्ठ अधिकाऱ्यांवर लैंगिक शोषणाचा आरोप केला आहे. धक्कादायक म्हणजे, ‘दोन पोलिस निरीक्षक आम्हाला सरकारी वाहनातून घरी घेऊन गेले आणि उपायुक्तांसह इतर अधिकाऱ्यांनी आमच्यावर तेथे बलात्कार केला.

पती तसेच इतर कुटुंबीय गावी असल्याने आम्ही महिला मुंबईत एकट्याच राहत असून पोलिस दलाबाबतही फारशी माहिती नाही. याचाच गैरफायदा घेऊन हे अधिकारी आम्हाला वारंवार शारीरिक संबंध ठेवण्यास भाग पाडत आहेत. हे सर्व कायमचे थांबविण्यासाठी आम्ही उपायुक्तांची भेट घेतली. मात्र त्यांनी आम्हाला केबिनमधून हाकलून दिले’, असे या पत्रात म्हटले आहे. ‘आमच्यावरील अत्याचार इतक्यावर थांबले नाहीत, तर उपायुक्तांचे ऑपरेटर, ऑर्डली आणि चालकांनीही वेळोवेळी धमकावून अधिकाऱ्यांच्या कार्यालयातच आमच्यावर बलात्कार केला’, असेही या पत्रात म्हटले आहे.

या व्हायरल पत्राची पडताळणी करण्यासाठी मोटर परिवहन विभाग तसेच, पोलिस दलातील अनेक अधिकाऱ्यांशी संपर्क सांधला असता त्यांनी यास दुजोरा न देता याविषयी सारवासारवच केली. ज्या महिलांची नावे लिहिण्यात आली आहेत त्यांनी हे पत्र लिहिलेले नाही, असे काही अधिकारी म्हणाले. बदली आणि बढती यातील चढाओढीमुळे हे आरोप करण्यात आले असावेत, असे काही अधिकाऱ्यांचे म्हणणे आहे. तक्रारी करण्याचे अनेक मार्ग आहेत. बदनामी आणि चर्चा होईल असा तक्रारीचा मार्ग महिला पोलिस अवलंबतील, असे वाटत नसल्याचे काही अधिकाऱ्यांनी सांगितले.

या प्रकरणाची सीबीआय, गुन्हे शाखा तसेच सायबर सेलमार्फत चौकशी करावी, अशी मागणी या महिलांनी केली आहे. अत्याचार करणारे अधिकारी आणि कर्मचारी यांच्याकडे छायाचित्रे आणि व्हिडीओ असून त्यांच्या मोबाइलचे तांत्रिक विश्लेषण होणे गरजेचे असल्याचे त्यांनी म्हटले आहे. या शरीरसंबंधांतून काही महिला गर्भवती राहिल्या. अधिकाऱ्यांनी त्यांना जबरदस्तीने गर्भपात करण्यास भाग पाडले. त्यामुळे या महिलांची वैद्यकीय तपासणी करणेदेखील महत्त्वाचे आहे, असे पत्रात म्हटले आहे.