नागपुरात मद्यधुंद प्रेमीयुगलाचा भररस्त्यात धिंगाणा

मद्यधुंद प्रेमीयुगलाने धिंगाणा घालून एकमेकांना मारहाण केली. मदतीसाठी आलेल्या तरुणीच्या मित्राने प्रियकरला पुन्हा मारहाण केली. यात प्रियकराच्या हाताला गंभीर जखमी झाली. ही घटना सदर पोलिस ठाण्याच्या हद्दीतील अचरज टॉवर परिसरात घडली. याप्रकरणी पोलिसांनी तरुणी व तिच्या मित्राविरुद्ध गुन्हा दाखल केला. दया (वय ५१), असे जखमीचे, तर सिमरन व तिचा मित्र जॉनी (सर्वांची नावे बदललेली), अशी गुन्हा दाखल करण्यात आलेल्यांची नावे आहेत.

दया हा बिल्डर आहे. गेल्या वर्षभरापासून दया हा सिमरनला ओळखतो. २५ नोव्हेंबरला सिमरन ही तिची मुले, नातेवाइक आणि दया सीताबर्डीतील मॉलमध्ये चित्रपट बघायले गेले. त्यापूर्वी दयाने मॉलसमोरील बारमध्ये दारू प्यायली. त्यानंतर दया हा सिमरन व तिच्या नातेवाइकांसोबत चित्रपट बघायला गेला. मध्यांतरात दया व सिमरनने बारमध्ये दारू प्यायली. चित्रपट संपल्यानंतर नातेवाइक वेगळ्या वाहनाने घरी गेले. दया व सिमरन हे दोघे दुचाकीने जात होते. यादरम्यान त्यांच्यात वाद झाला. यावेळी तिने दयाला अचरज टॉवर परिसरात सोडण्यास सांगितले. रात्री १०.३० वाजताच्या सुमारास दोघेही या ठिकाणी आले. त्यांच्यात पुन्हा वाद झाला.

यावेळी जॉनी तेथे आला. त्याने ‘काय झाले’ अशी विचारणा सिमरनला केली. दयाने वाहनाने मला धडक दिल्याचे तिने सांगितले. त्यामुळे रॉनी याने दयाला मारहाण करण्यास सुरुवात केली. याचदरम्यान दयाची सोनसाखळी व ब्रेसलेट गायब झाले. ते सिमरनच्या हातात दयाला दिसले. त्याने दागिने परत मागितले असता सिमरनने दागिने देण्यास नकार दिला.

दरम्यान, पोलिस तेथे पोहोचले. तिघांना सदर पोलिस ठाण्यात आणले. यावेळी समिरनने दयाला दागिने परत केले. याप्रकरणी दयाने दिलेल्या तक्रारीवरून सदर पोलिसांनी सिमरन व जॉनीविरुद्ध गुन्हा दाखल केला. यापूर्वीही दया व सिमरनचा वाद झाला असून, हा वाद कपिलनगर व जरीपटका पोलिस ठाण्यापर्यंत पोहोचला आहे.