‘महादेव’ या ऑनलाइन बेटिंग अ‍ॅपवरून छत्तीसगडमधील राजकारण तापलं आहे. ‘महादेव’ बेटिंग अ‍ॅपच्या प्रवर्तकांनी मुख्यमंत्री भूपेश बघेल यांना आतापर्यंत ५०८ कोटी रुपये दिल्याचा दावा सक्तवसुली संचालनालयाने (ईडी) शुक्रवारी ( ३ नोव्हेंबर ) केला. तसेच हे प्रकरण चौकशीच्या कक्षेत येत असल्याचे सांगितले. यावरून बघेल यांना भाजपाकडून लक्ष्य करण्यात येत आहे. आता शिवसेना ( ठाकरे गट ) पक्षप्रमुख उद्धव ठाकरे यांनी यावर भाष्य करत भाजपावर हल्लाबोल केला आहे.
- Advertisement -
“‘महादेव’ बेटिंग अ‍ॅप प्रकरणावरून भूपेश बघेल भाजपात जाणार नाहीत. पण, बघेल भाजपात गेले, तर ‘महादेव’ बेटिंग अ‍ॅपचे ‘हर हर महादेव’ अ‍ॅप होईल. एवढं निर्लज्जपणाने चाललं असताना आपण गप्प कसं काय बसू शकतो?” असा संतप्त सवाल उद्धव ठाकरेंनी उपस्थित केला.
