४०६८ मालमत्ताधारकांना मिळाली ७ लाख रुपयांची सूट

लातूर शहर महानगरपालिकेने मालमत्ताकराच्या वसुलीसाठी जुलै आणि ऑगस्ट महिन्यात वेगवेगळ्या पद्धतीने सवलत जाहीर केली होती.शहरातील ४०६८ मालमत्ताधारकांनी या सवलतीचा लाभ घेतल्याने मालमत्ताधारकांना एकूण ७ लाख २ हजार ९०२ रुपयांची सुट मिळाली. शहरातील इतर मालमत्ताधारकांनीही या कर सवलत योजनेचा लाभ घ्यावा,असे आवाहन मनपाच्या वतीने करण्यात आले आहे.

शहरातील मालमत्ता धारकांकडे थकलेला कर वसूल करण्यासाठी मनपाने चालू आर्थिक वर्षातील फक्त मालमत्ताकरामध्ये सूट देण्याचा निर्णय घेतला आहे. ३१ जुलै अखेरपर्यंत मालमत्ताकराचा भरणा करणा-या मालमत्ताधारकांना ५ टक्के तर ३१ऑगस्टपर्यंत कर भरणा-यांना ४ टक्के सूट देण्याचा निर्णय घेण्यात आलेला आहे. ३१ जुलै अखेरपर्यंत शहरातील एकूण २९९४ मालमत्ताधारकांनी याचा लाभ घेतला.

मनपाने ऑगस्ट महिना अखेरपर्यंत मालमत्ता कर भरणा-यांना ४ टक्के सवलत देण्याचे जाहीर केले आहे. त्यानुसार दि. १ ते २१ ऑगस्ट या कालावधीत १०७४ मालमत्ताधारकांनी योजनेचा लाभ घेत कर भरणा केला. या मालमत्ता धारकांकडून ९३ लाख ६१ हजार ५१ रुपये कर येणे बाकी होते. ४ टक्के सवलतीचा लाभ घेत या मालमत्ता धारकांनी एकूण ९२ लाख ३८ हजार ४८९ रुपयांच्या कराचा भरणा मनपाकडे केला. त्यामुळे या मालमत्ताधारकांचे १ लाख २२ हजार ५६२ रुपये वाचले. शहरातील इतर मालमत्ताधारकांनीही या सवलत योजनेचा लाभ घ्यावा.ऑगस्ट अखेरपर्यंत ४ टक्के सवलत योजना सुरु राहणार आहे. या कालावधीत आपल्याकडील कराचा भरणा करावा, असे आवाहन पालिकेच्या वतीने करण्यात आले आहे.